Pinasingkedan ti Commission on Elections (Comelec) en banc ti ruling daytoy a maibasura ti petition for disqualification kontra iti Bagong Henerasyon (BH) partlylist ken dagiti nominado daytoy.
Iti walo a panid a desision, inwaksi ti poll body en banc ti motion for reconsideration (MR) nga impila ni petitioner Russel Stanley Geronimo.
Dagiti nainaganan a respondents iti kaso ket ti BH party-list group, agraman da Rep. Bernadette Herrera, Robert Gerard Lopez Nazal Jr., ken Maria Editha Tan Alcantara.
Sigun iti Comelec en banc, ti petitioner ket napaay a mangidatag kadagiti baro nga ebidensia.
Idi laeng napalabas a lawas, dinismisar ti Comelec First Division ti disqualification petition nga impila ni Geronimo gapu iti saanna a panangiserbi iti kopia ti petision kadagiti respondents babaen ti personal service ken gapu iti saanna a panangi-attach iti kopia ti Certificate of Nomination-Certificate of Acceptance of Nomination.
Maipalagip nga intantan ti Commission on Elections, nga agserserbi kas National Board of Canvassers, ti pannakaiproklamar ti BH Party-list ken Duterte Youth gapu iti pending a petision a naipila kontra kadakuada.
