Makikikoordinaren ti Commission on Elections (Comelec) iti konsulado ti Hong Kong tapno maberipikar ti report ti maatap a vote-buying bayat ti kaudian a political rally para iti Eleksyon 2025.
Sigun kenni Commission on Elections (Comelec) Chairperson George Erwin Garcia, makumpirmar paylaeng ti naipablaak iti social media a mapapati a nakaawat dagiti botante nga Overseas Filipino Workers nangruna dagiti nakipaset iti programa ti HKD200 wenno agarup P1,500.
Sumagmamano a pablaak iti social media ti nangpabasol a ti political slate ni Duterte ti nangiwaras iti HKD200 iti tunggal timmabuno tapno maimpluensiaan ida a mangbutos a pabor kadagiti kandidato a senador ti nasao a grupo.
Kinuna ni Garcia nga awan pay ti naawat ti Comelec a reklamo wenno surat mainaig iti nasao nga insidente ngem no maduktalan a pudno ket mabalin a sumango iti kaso a “disqualification” dagiti nagbiddut a kandidato.
