Palubosan itan ti Commission on Elections (Comelec) dagiti nabutosan nga opisial ti barangay ken Sangguniang Kabataan (SK) a makipaset iti “partisan politics” wenno “electoral activities” para iti Eleksyon 2025.
Sigun kenni Comelec chairman Atty. George Erwin Garcia, apaman a mabutosan ti maysa nga opisial, mabalinen a politikal dagitoy, mabalin a sumuporta metlaeng iti kandidato ken mabalin a makitugot iti kampania.
Iti sidong ti Comelec Minute Resolution 24-1001, kinuna ti poll body a mabalin a makipaset dagiti elective officials kadagiti aktibidad ti kampania ti eleksion para iti masungad a panagbutos, babaen ti panangdakamatda ti desision ti Korte Suprema (SC) a mangibagbaga a mailaksidda iti Section 261(i) ti Omnibus Election Code (OEC).
Maipalagip a nakalanad iti Section 261(i) ti Omnibus Election Code (OEC) a maipawil kadagiti civil service officers ken empleyado a makipaset iti partisan politics ken aktibidad iti kampania bayat ti eleksion.
