Manamnama a marevive ti operasyon ti Flag Carrier Philippine Airlines (PAL) a Cebu-Baguio flight ken vice versa kalpasan nga inkeddeng ti nasao nga airline nga isardeng ti operasyon dagitoy.
Iti panakiuman ti Bombo Radyo kenni Engr. Bonifacio Dela Peña, City Administrator, kinunana a ti rason ti panagsardeng ti operasyon ti nasao nga airline ket gapu ta saanen a feasible ken viable kayatna a sawen a maluglugidan ken saanda a masustinir ti operational cost.
Malaksid iti dayta, daytoy ket tapno maipangpangruna pay ti kinatalged dagiti pasaheros nangruna iti panawenen ti panagtutudo.
Ngem kinuna ni Dela Peña a maisubli ti operasyon dagitoy kalpasan ti rainy season wenno iti kabiitan a panawen.
Sigun pay iti City administrator, saan a daytoy ti umuna a gundaway nga impakaamo ti Flag Carrier Philippine Airlines (PAL) nga agbalbalin a pakaseknanda ti bassit a pasahero a mabalin a mangitunda iti panagsardeng ti operasyon dagitoy.
Kabayatanna, manamnama a maapektaran ti turismo iti siudad ti Baguio gapu ta makissayan dagiti turista nga agtaud manipud Cebu.
Silulukat met ti Loakan airport para kadagiti chopper nu pay kasta nasken a masurot ti scheduling dagitoy.//Bombo Mera Pacpacan
