Nangipila ti maysa a religious group, sigud nga opisyal, ken civil society organizations iti reklamo kontra kenni Commission on Elections (Comelec) chairperson George Garcia ken dadduma pay nga opisyal gapu iti mapapati a pannakibiangda iti software a naaramat iti 2025 Midterm Election iti pagilian.
Karaman kadagiti nagreklamo ni Atty. Alex Lacson, San Carlos Bishop Gerardo Alminaza, Kidapawan Bishop Jose Colin Bagaforo, former Comelec Commissioner Augusto Lagman, former Financial Executives Institute of the Philippines president Franklin Ysaac, ken Isabela Vice Mayor Harold Respicio.
Malaksid kenni Garcia, napilaan metlaeng iti reklamo ti innem a Comelec Commissioners ken tallo nga indibidual a respondents.
Sumangsango dagitoy iti 110,000 counts ti system interference kadagiti 110,000 ACMs a naaramat idi 2025 elections.
Naireklamo metlaeng dagitoy iti 55,874,700 counts ti system interference kadagiti 55,874,700 votes a pinagtitiponda iti Data Center 3.
Sigun kadagiti nagreklamo, mapapati a nilabsing dagiti respondents ti Paragraph 4, Section 4 ti Cybercrime Prevention Act ken dadduma pay.
Kabayatanna, kinuna ni Comelec chairperson George Garcia a silulukat ti Comelec iti aniaman nga imbestigasion iti 2025 polls.
