Kidkiddawen ti Commission on Elections (Comelec) iti publiko a makitinnulong kadagiti otoridad kadagiti election checkpoints, ken nawaya dagitoy a mangireport kadagiti reklamo iti kanito nga adda ti makitada nga “abuse of authority.”
Sigun kenni Commission on Elections (Comelec) Chairman George Garcia, ipatungpalda ti “plain view doctrine” bayat dagiti inspeksion.
Pinalagipan ti nasao nga opisial ti publiko a ti nagan ti komander iti stasion ken ti contact number daytoy ket nakaparang iti Comelec checkpoint signage tapno nalaka nga agreklamo dagitoy.
Kas idi napalabas nga eleksion, maipasdek ti checkpoint kadagiti paset ti pagilian bayat nga epektibo ti gun ban.
Itay laeng nabiit, nailasin ti Comelec ti 38 a lugar a nakaro a pakaseknan wenno dagiti lugar nga adda iti sidong ti “red category.”
Nupay kasta, inlawlawag ni Garcia a ti areas of concern ket saan a nairanta a mangbutbuteng iti publiko para iti eleksion inton Mayo 12.
Kabayatanna, kinuna ti Philippine National Police ken Armed Forces of the Philippines a mangideploy wenno mangibaon dagitoy iti kanayunan a personel kadagiti lugar a “grave concern,” nangruna iti Bangsamoro region.
