Panggep ti Commission on Elections (COMELEC) a kissayan ti bilang dagiti party-list group a makipaset iti May 2025 elections iti agarup 130 manipud iti 177 a bilang idi napalabas a May 2022 elections.
Inlawlawag ni George Garcia, Chairperson ti Commission on Elections (COMELEC) a panggep ti nasao nga addang a siguradoen a kualipikado dagiti party-list group a makipaset inton sumaruno nga election ken tapno maliklikan ti atiddog nga official ballot para iti midterm elections.
Sigun pay kenni Garcia, ipatpatungpal ti Comelec ti nainget a pagannurotan maipapan iti accreditation dagiti baro a party-lists, tapno makissayan ti bilang dagiti kandidato.
Iti agdama, naikkaten ti 130 a Petitions for Registration of party-lists manipud iti agarup 200 nga aplikante ken naikkan ti akreditasion dagiti sangapulo ket pito nga organisasion ti party-list.
Kabayatanna, mabalin a makipaset iti party-list elections dagiti grupo a nairehistro iti Commission ken nangisubmitir ti Manifestation of Intent to Participate.
