![](https://img.bomboradyo.com/baguio/2021/06/PAN-TREE.jpg)
BAGUIO CITY – Iyaw-awis ti Provincial Environment and Natural Resources Office (PENRO) – Benguet kadagiti umili ti programada a panagmula ti kayo a naawagan ti Community Pan-TREE kagiddan ti panakarambak ti Environment Month.
Iti panakiuman ti Bombo Radyo Baguio, kinuna ni Forester Mary Ann Matso, Environment Management Specialist II ti PENRO-Benguet a mangipapaay ti opisinada iti libre a kayo para kadagiti agtarigagay nga indibidual nga agmula iti daytoy.
Dinakamatna a mabalin a makaala ti maysa nga indibidual iti saan a sumurok iti 30 a puon ti kayo la ketdi kabaelanda nga imula ken taraknen dagitoy.
Kinunana a Benguet Pine Tree laeng ti iwarwaras ti opisinada ngem dagiti interesado nga agmula ti kape ken alnos tree ket mabalin nga agturong iti opisina ti Community Environment and Natural Resources Office (CENRO) a masakaran sadiay Caliking, Atok, Benguet ken Pacdal, Baguio City.
Kinuna pay ni Matso nga agtultuloy ti panangipaayda ti kayo kadagiti agtarigagay nga agmula kadagiti masakupanda a lote wenno daga agingga a malpas ti agdama a panagtutudo.