BAGUIO CITY – Mangipatungpal iti concert for a cause ti Sablan Municipal Police Station para kadagiti estudyante ti elementarya iti nasao a munisipyo.
Iti panakipatang ti Bombo Radyo kenni PSI Alfredo Dacumos, hepe ti Sablan PNP, kinunana a panggep ti nasao a konsierto a matulongan ti nasurok sangaribu nga elementary students iti nadumaduma a pagadalan sadiay Sablan.
Kinunana a ti maurnong a pondo ket aramatenda a panggatang iti baro nga uniporme dagiti nasao nga estudyante.
Dinakamatna a naimbitaran nga agkanta ti banda ti Benguet Police Provincial Office, Police Regional Office Cordillera, Baguio City Police Office ken dadduma pay a singers manipud ditoy siudad ti Baguio ken iti probinsya ti Benguet.
Ginuyugoyna met dagiti interesado a tumulong kadagiti estudyante a gumatangda laeng iti tickets iti Sablan MPS.
Maangay ti nasao a konsierto inton Setyembre 30 iti alas sais ti sardam sadiay Sablan Municipal Gym.
