BAGUIO CITY – Isingsingasing ti Department of Environment and Natural Resources (DENR) – Cordillera ti panakaipatungpal ti concrete sloping kadagiti bantay iti paset ti Kennon Road.
Sigun kenni DENR-Cordillera regional director Ralph Pablo, daytoy ti makitkitada a solusyon iti Kennon Road, partikular iti panakargaay dagiti bato ken daga manipud iti ngato dagiti bantay.
Kinunana a nasken nga ammuen pay ti DPWH dagiti disso wenno bantay iti Kennon Road a saan a natalged tapnu sadiay a maipatungpal ti concrete sloping.
Sigun kenkuana, naipatungpalen ti concrete sloping kadagiti bantay iti dadduma a munisipyo ti Benguet.
Nupay dakkel ti mabusbus iti nasao a panggep, impetteng ni Pablo a ti napateg ket saanen a manayonan ti bilang dagiti madangran wenno matay nga indibidual ken magaburan a lugan gapu iti landslide ken rockslide iti Kennon Road.
Inyunay-unayna a saan nga umdas ti panag-riprap wenno panagkabiti laeng kadagiti igid dagiti kalsada gaputa nasken nga adda ti dadduma a wagas tapnu marisut ti parikut iti nalatak a Kennon Road.