LA TRINIDAD – Manamnama ti pannakaileppas ti construction ti Cell 2 ti landfill sadiay Brgy. Alno, La Trinidad kalpasan ti dua agingga tallo a bulan.
Iti panakiuman ti Bombo Radyo kenni Arthur Pedro, Administrative Officer V ti La Trinidad Municipal Environment and Natural Resources Office, kinunana a manarimaanen ti pannakatarimaan ti nasao a cell agsipudta napunno-en ti Cell 1.
Iti agdama ket maiturturong dagiti basura sadiay Urdaneta, Pangasinan.
Imbinglayna pay a gapu iti temporaryo a pannakaiserra ti landfill sadiay Urdaneta idi Hunyo a dos iti agdama a tawen ket naiturong dagiti basura a nakolektar manipud kadagiti nagduduma a barangay iti munisipyo sadiay landfill ti La Trinidad.
Nupay kasta,nag-resume ti operasyon ti landfill sadiay Urdaneta idi Hunyo a singko, rason a maituloy ti pannakaiturong dagiti basura sadiay.
Mainaig iti dayta, inyebkas pay daytoy a ti kita ti basura a maiturturong laeng sadiay Urdaneta ket dagiti residuals.
Gapu iti kinaaddda ti composting facility ti nasao a munisipyo, sadiay metten a maiturturong dagiti nabubulok a basura.
Kabayatanna, kidkiddawenna met ti agtultuloy a panag-segregate dagiti umili kadagiti basura dagitoy agsipudta agsabali en a truck ti agkolkolekta iti nabubulok ken saan a nabubulok a basura.
