BAGUIO CITY – Nakemmeg manen ti maysa a baro a target list ti otoridad iti buy-bust operation sadiay Upper General Luna, Baguio City idi Biyernes, October 30.
Nabigbig daytoy a ni John Paul Villarubia Fernando, 20-anyos, construction worker ken residente ti Alfonso Tabora, Baguio City.
Maibasar iti rekord ti pulisya, nakemmeg ni Fernando idi 17-anyos daytoy iti buy-bust operation idi August 2017 iti deppaar ti Middle Quirino Hill.
Nakumpiskar kenkuana ti maysa a pakete ti maatap a shabu ken narekober ti naaramat a buy-bust money.
Gaputa maibilang a menor de edad ni Fernando idi nakemmeg idi August 2017, naipaima daytoy iti Social Development Center sadiay Barangay Irisan.
Nupay kasta, naglibas ni Fernando iti nasao a pasilidad agingga a nakemmeg manen idi kalman ken ita ket adda iti kustodiya ti pulisya para iti disposisyon ti kasona a panaglabsing iti Comprehensive Dangerous Drugs Act of 2002.
