BAGUIO CITY – Agpapaimbag ita ti maysa a construction worker bayat a maan-anop ti bayawna a nangbagbagsol kenkuana iti mismo nga uneg ti pagtaenganda sadiay Old Forestry Compound, Engineer’s Hill Barangay, Baguio City idi kalman.
Nabigbig ti biktima a ni Michael Rullepa Peralta, 37-anyos, naasawaan ken residente iti nasao a lugar bayat a nabigbig ti suspek a ni Jerrywin Pecho Peralta, 32-anyos, construction worker ken residente ti Lower Cabinet Hill, siudad ti Baguio.
Maibasar iti report, simmangpet ti nabartek a suspek iti pagtaengan ti biktima ken nagdiretso iti sala nga ayan ti biktima ken ti anak daytoy nga agbuybuya iti telebisyon.
Nakita ti asawa ti biktima ti panagturong ti suspek iti kusinada ken ti panagala daytoy iti kutsilyo sakbay a nagsubli iti sala.
Kalpasanna, nangngegna ti panagpaarayat ti asawana ken iti panagturongna iti sala ket sadiay a naaktuanna ti panangbagbagsol ti suspek iti biktima.
Induronna ti suspek paruar iti pagtaenganda sakbay nga inrikepna ti ruangan ken nagpaarayat kadagiti kaarubada.
Naitaray ti biktima iti pagagasan babaen iti asawana bayat a naglibas ti suspek.
