![](https://img.bomboradyo.com/baguio/2020/08/pinatayda-2-scaled.jpg)
BAGUIO CITY – Sumangsango iti kaso a homicide ti maysa nga construction worker gapu iti panangtagtagbatna iti padana a construction worker sadiay Block 9, Purok 14, Cypress Point, Barangay Irisan, Baguio City idi kanikadua.
Nabigbig daytoy a ni Ryan Badillo Almine, 34-anyos, tubo ti Masbate ken residente Cypress, Irisan, Baguio City.
Nabigbig met ti biktima a ni Michael Ying Viernes, 40-anyos, tubo ti Fairview, Manila ken residente Purok 14, Irisan, Baguio City.
Maibasar iti report ti Baguio City Police Office – Station 9, insalaysay ti testigo a ni Mary Gorospe Laguit a residente metlaeng iti nasao a lugar a nakitana da Almine ken ti kakadwa daytoy nga agin-inom iti arak iti paraanganda.
Nupay kasta, kilaat a nagturong sadiay ni Viernes a patien ti testigo a nakainom iti arak.
Kinuna ti testigo a nakaiggem ni Viernes iti buneng.
Dinakamatna metlaeng a namin adu a daras a kinarkarit ni Viernes ti suspek isut gapuna a kinomprontar daytoy ti suspek agingga a nagkinnamat dagitoy.
Kalpasan ti sumagmamano a gundaway ket nagsubli ni Almine iti balayda a dara-dara ti badona ken dagus nga immuneg.
Dagus met a rimwar dagiti dadduma a testigo tapnu ammuen ti napasamak ken sadiayda a nakita ni Viernes a nakadasay iti dalan a dara-dara.
Nagtawag a dagus iti pulisya dagiti testigo ken iti panagresponde dagiti pulis ket narekoberda iti abay ti bangkay ni Viernes ti maysa a buneng ken kutsilyo.
Pimmusay ti biktima gapu kadagiti dunor a nasagrap daytoy iti nagduduma a paset ti bagina ken iti agdama ket naiturongen ti bangkayna iti maysa a punerarya para iti panakalamay daytoy.
Nakemmeg met ni Almine ken sumangsangon iti kaskenan a kaso.