Manarimaan ti imbestigasion ti Baguio City Police Office ti ipupusay ti maysa a construction worker a nasarakan nga awanan ti biag iti uneg ti barracks iti rabii idi Nobiembre 3, 2O25.
Iti oras ti alas-10 ti rabii, simmangpet ti maysa a delivery rider iti uneg ti barracks ti construction worker idiay Eagle Crest, Phase 1, Bakakeng Norte, Baguio City.
Inawagan ti rider ti agnanaed iti nasao a balay ngem awan ti simmungbat.
Nagsirip ti rider iti tawa ket naimatanganna ti construction worker a naka-idda ken impagarupna a matmaturog.
Idi inulit-ulitna nga inawagan ti atension ti lalaki a saan nga agsasao, inawagan ti rider ti construction foreman.
Idi nalukkatan ken simrekda iti barraks, nadiskobreda a pimmusay ti lalaki.
Nabigbig ti pimmusay nga agtawen ti 47, tubo idiay Naguilian, La Union, a natangdanan a mangged kas construction worker iti nasao a lugar.
Iti agdama, agtultuloy ti imbestigasion dagiti otoridad iti insidente tapno maammuan ti eksakto a rason ken kasasaad a nanglikmut iti ipupusayna.
