BAGUIO CITY – Naipilan ti kaso a panagtakaw kontra iti maysa a lalaki a nagtakaw iti uneg ti surgery ward ti maysa nga ospital sadiay Km. 5, Pico, La Trinidad, Benguet.
Nabigbig daytoy a ni Jasper Kabang Padilla, 29-anyos, baro, construction worker, tubo ti Indang, Cavite ken residente ti Km. 3, La Trinidad, Benguet.
Nabigbig met ti biktima a ni Marissa Costales, 38-anyos, naasawaan ken residente ti Naguillian Road, Baguio City.
Sigun iti La Trinidad PNP, incharge ti biktima ti cellphone-na sakbay a naturog iti uneg ti nasao a surgery ward bayat ti panagbantayna iti asawana.
Nariing daytoy gapu iti presensya ti maysa a lalaki ngem nakitana a dagus a rimwar ti nasao a tao.
Nupay kasta, nadlawna a mapukpukaw ti cellphone-na nga aggatad ti P15, 000.
Nagpatulong ti biktima iti gwardia sadiay ken sinurotda ti nasao a lalaki agingga a nakemmeg daytoy.
Nakumpiskar iti suspek ti mapukpukaw a cellphone ti biktima.
