BAGUIO CITY – Pimmusay ti maysa a construction worker kalpasan a nairaman daytoy iti maysa a panagpabettak iti maar-aramid a kalsada sadiay Luba, Abra idi kanikadua.
Nabigbig daytoy a ni Jason Evaresto, 22-anyos, baro, construction worker ken residente ti Nagbukel-Tuquipa, Luba, Abra.
Sigun iti Luba PNP, pinaka-ammuan ti maseknan a construction company dagiti trabahador ti maar-aramid a Poblacion-Gayaman Farm-to-Market Road nga adda ti isayangkatda a panagpabettak iti asideg wenno bisinidad ti maysa a waig sadiay.
Panggep ti panagpabettak a palawaen pay ti maar-aramid a kalsada isut gapuna a kasapulan a pumanaw pay dagiti trabahador iti nasao a lugar.
Nupay kasta, nakita laengen dagiti kakadua ti biktima nga adda paylaeng daytoy iti asideg ti pakaipatungpalan ti panagpabettak agingga a natamaan daytoy iti napasamak a panagbettak.
Nagsagrap ti biktima iti nauuneg a dunor iti nagduduma a paset ti bagina ken idi naiyakar daytoy iti Candon General Hospital manipud iti Gayaman Health Center ket naideklara daytoy a dead on arrival.
