Construction worker, pimmusay kalpasan nga aksidente a natnag iti maar-aramid a gym sadiay Bokod, Benguet

BAGUIO CITY -Pimmusay ti maysa a construction worker kalpasan nga aksidente a natnag manipud iti maar-aramid a gym iti asideg ti Bokod Central Elementary School sadiay Poblacion, Bokod, Benguet.

Nabigbig daytoy a ni Ferdinand Flores Gurtiza, 32-anyos, baro ken tubo ti Bauang, La Union.

Maibasar iti report, immuli ti biktima iti maar-aramid a gym tapno isaganana dagiti contruction materials a maaramat iti panakaatep ti nasao a pasdek.

Naamoan a naikaglis ti biktima gapu iti nabasa a roofing rason a natnag iti 40 feet ti kangatona a pasdek a nangitunda iti dagus nga ipupusay daytoy.