BAGUIO CITY – Ar-aramaten ita ti Bontoc Mt. Province ti Contact Tracing System ti Baguio City nga immunan a napaneknekan nga epektibo a mangpapartak ken mangpabileg iti contact tracing.
Sigun kenni Municipal Health Officer Dr. Diga Kay Gomez, indiaya ni Mayor Benjamin Magalong ti nasao a wagas kalpasan a nailista ti munisipyo ti kaunaan a kaso ti B.1.1.7 (UK variant) idi Enero ti agdama a tawen.
Kinunana a pinatganda ti singasing ti nasao a mayor rason a nangalada iti uppat nga Information Technology Graduate a mangimaton iti encoding process dagiti impormasyon a nakairekord dagiti contact tracing ken monitoring team duretso iti system ti lokal a gobyerno ti siudad.
Nagyaman met ni Bontoc Mayor Franklin Odsey ken Mayor Magalong gaputa saan a mailibak a dakkel ti naitulong ti nasao a sistema iti naparpartak a panakabigbig ken panakaduktal dagiti indibidual a positibo iti COVID-19.
