BAGUIO CITY -Nakasagana ti siudad ti Baguio iti kanito a makastrek ti Omicron variant ti COVID19 ditoy pagilian.
Daytoy ti impanamnama ni City Administrator Engr. Bonifacio de la Peña iti interview ti Bombo Radyo Baguio.
Kampante daytoy a kabaelan ti siudad a respondean ti agbalin a pangta ti COVID19 variant a naduktalan sadiay South Africa gaputta kinabaelan ti siudad a respondean ti Delta variant nga immunan a nagraira ditoy pagilian.
Sigun kenkuana, nagtaripnongdan kadagiti maseknan nga ahensia ken ti COVID19 task force ti siudad para iti inisyal a contingency plan dagitoy.
Dinakamatna nga adda ti umdas a suplay ti oxygen ken dadduma pay a medical equipment, kasta pay dagiti isolation units iti kanito a mapasamak ti pagam-amkan a pangta ti Omicron.
Innayonna nga iparikepda ti Teacher’s Camp ken Sto. Niño Isolation Units para iti rehabilitasion malaksid pay a mairtengan ti operasion ken panagsagana dagiti kangrunaan nga ospital ditoy siudad.
Impannakel pay ni Engr. de la Peña nga umanay dagiti pagannurutan ti siudad tapno malapdan wenno respondean ti posible nga iseserrek ditoy siudad ti nasao a variant kas iti VISITA app ken ti HDF online registration tapno mapalaka ti contract tracing efforts ti siudad.//RMBLS
