BAGUIO CITY – Tuttutukan ita dagiti boxing promoters manipud rehion Cordillera dagiti boksingero a nakabase ken agsansanay iti lokalidad a makilablaban iti ruar ti pagilian.
Iti panakiyuman ti Bombo Radyo kenni boxing promoter a ni Darwin Miller Dep-ay, kinunana nga addan dagiti boksingero dagitoy a naituding a lumaban iti dadduma a pagilian ita a bulan ken iti sumaruno a bulan ti September.
Kinunana a maipasungalngal ni Joepher Berja Montaño kontra kenni Atchariya Wirojanasunobol [WIRO-JANA-SUNO-BOL] ti Thailand para iti WBC Asia Interim Super Lightweight Title sadiay Bangkok, Thailand inton August 18.
Sarunuen daytoy ti laban ni sigud a WBO Minimumweight Champion Merlito Sabillo kontra kenni Jing Xiang ti China para iti bakante a WBC Silver World Light Flyweight Title inton September 15 sadiay Qinzhou, China.
Naituding met a lumaban ni OPBF Flyweight Champion Jay-R Raquinel para iti WBC International Flyweight Title iti maudi a lawas ti September sadiay China ngem awan pay ti naituding a makalabanna.
Kabayatanna, makasango met ni Nathan Bolcio ti Pinoy metlaeng a ni Al Toyogon para iti bakante a WBC Asia Silver Super Featherweight Championship inton September 8 iti MOA sadiay Pasay.
Maangay metlaeng iti kapada a venue ti laban da Jomar Fajardo ken Cris Paulino para iti WBC Asia Super Flyweight Title inton September 22.
