BAGUIO CITY – Maangay ita nga aldaw ti Miyerkoles agingga inton Biyernes ti maikatlo a Cordillera Environment Summit.
Manamnama a dar-ayan daytoy ni Environment and Natural Resources Secretary Roy Cimatu ken idauluanna pay ti panakaipaay ti Gawad Pagkilala kadagiti nangabak iti Search for the Cleanest and Greenest Barangays, Municipalities iti rehiyon a nagtungpal iti Ecological Solid Waste Management Act of 2000 ken kadagiti private individuals a nakaipakita iti naisangsangayan a kontribusyon iti environmental protection and enhancement.
Iyusuat pay ni Cimatu ti ‘Tayo ang Kalikasan Movement’ a maysa a peoples’ environment stewardship movement nga idadauluan ti ahensia para iti panakaiturong ti pagilian iti nasustinir a panagdur-as.
Maiparang pay iti 3-day summit dagiti kabaruan a damag iti Solid Waste Management ti Cordillera, dagiti kaso a naipila kontra kadagiti lokal a gobyerno a naglabsing iti Ecological Solid Waste Management Act of 2000, ti kasasaad ti mining industry ken dadduma pay.
Ibingay met dagiti maseknan a lokal a gobyerno ti kapadasan ken kasayaatan nga ar-aramiden dagitoy seknan kadagiti ordinansada a mangipawpawil iti panagaramat ti plastic.
Naisagana pay dagiti dadduma nga aktibidad kas iti panakaiparang dagiti biodegradable plastic bags, ti panagbalin dagiti plastic waste iti art ken exhibit dagiti nagduduma a solid waste management alternative technologies, recycled products manipud kadagiti recycling practitioners ken dadduma pay.
Paset daytoy ti panakarambak ti Hunyo kas Environment Month nga addaan tema a Sustaining Cooperation and Partnerships.
