Karaman ti rehion Cordillera iti programa a PMNP-CONNECT, wenno Philippine Multisectoral Nutrition Project – Converging Nutrition Efforts for our Children’s Tomorrow, a panggepna a makessayan ti kaso iti stunting wenno panagbassit iti panagdakkel dagiti ubbing.
Sigun kenni Regional Nutrition Program Coordinator Bella Basalong, kangrunaan a panggep ti proyekto ti panagbaba iti stunting rate babaen iti nalawlawa nga “access” iti nutrision ken serbisio para kadagiti ubbing ken pamiliada, usar ti interbensyon manipod iti nagduduma a sektor iti gobierno.
Iti Cordillera, dua a munisipyu idiay Abra—Tineg ken Langiden—ti napili kas paset, gaputa agpada a nasurok a 20% ti stunting rate, maibasar iti datos idi 2024, ken nangato ti lebel ti kinapanglaw ken kinaawan ti seguridad ti taraon idi 2021.
Iti agdama, dumanon iti 23% ti stunting prevalence iti Cordillera, dandani kaasping iti national average a 23.1%.
Sigun kenni Basaling, adu iti gapuanan iti stunting ket gapu iti kinakurang iti umno a panangaywan, limitado nga access iti nasustansia a taraon, ken kinakurang iti kangrunaan a serbisio, isut gapuna a kritikal ti multisectoral approach.
Agbayag ti proyekto manipod iti tawen 2027 agingga 2032, ken pinondoaan iti World Bank ken isaysayangkat iti nasional a gobierno babaen iti Department of Health, DSWD, ken National Nutrition Council.
Panggep daytoy a pasayaaten iti antenatal care para iti panagsikog, panagngato iti diet diversity kadagiti ubbing nga agtawen iti 6 agingga 23 a bulan.
Sigun kenni Basalong, adu a pamilia ti nakapokus laeng iti panangipaay iti umdas a taraon kas iti lugaw wenno sopas, ngem awanan iti umdas a sustansia. Kinunana a napateg ti dakdakkel a dietary diversity ken rumbeng a suportaran dagiti programa ti food security ti Department of Agriculture.
Innayonna pay a panggep metlaeng iti PMNP-CONNECT a papigsaen ti lokal a gobierno ken pondo para iti nutrision, tapno masigurado ti panagtultuloy iti programa uray malpas ti proyekto.
