BAGUIO CITY – Pormalen a nagtugaw kas baro a dadaulo ti Police Regional Office Cordillera (PROCOR) ni PCSupt. Edward Carranza a sigud a PNP Director for Health Services.
Sinukatanna ni PCSupt. Elmo Francis Sarona nga agtugaw met kas Directorate for Investigation and Detective Management (DIDM) ti PNP.
Iti panagbitla ni Sarona, kinunana a nakalalagip ti Cordillera a nagpaayanna iti maysa a tawen ken innem a bulan gaputa nagtalinaed ti panakikaykaysa dagiti umili iti pulisya iti panawen ti panagballigi ken panagparikut.
Inladawanna ti panangidaulona iti PROCOR kas maysa a rollercoaster ngem kinunana a dagiti balligi ken karit a sinango dagitoy ket nangipaay met iti adal tapnu napagtalinaed ti tarigagayda nga agtalinaed a napintas ti linnangen ti publiko ken ti pulisya.
Kinunana nga iti panangidaulona iti Cordillera PNP ket nagtalinaed dagiti pammadayaw a naaw-awat dagiti pulis iti rehion gapu kadagiti naar-aramidan dagitoy kas iti benneg ti linak ken kappia.
Impannakkelna nga iti sidong ti lideratona iti Cordillera PNP ket bimmaba iti 35 percent ti crime volume ti enterio a rehion idi napalabas a tawen ken idi laeng nabiit ket naawatda ti Gold Eagle Award manipud iti Philippine National Police gaputa dagitoy ti kangatuan ti rating iti Performance Governance System.
Innayonna pay nga awan ti aniaman a dakkel nga isyu a nakairamramanan dagiti pulis ti Cordillera ken nagbalin a nadalus ti rekord ti PROCOR iti panangidaulona iti daytoy.
Kabayatanna, inkari met ni PCSupt. Carranza nga ituloyna dagiti programa ti organisasyon a sinublatna manipud kenni PCSupt. Sarona.
Sigun kenkuana, awan ti sukatanna kadagiti agdama a program ti PROCOR ken ituloy dagitoy.
Dinakamatna a ti kangrunaan a tarigagayna iti panangidaulona iti rehion Cordillera ket ti ad-adda pay a panakaguyugoy dagiti rebelde iti panagsuko dagitoy ken iti panakitinnulongda iti gobyerno.
Innayonna a prebilehiyo para kenkuana ti agserbi iti rehion gaputa ammona ti kultua ti Cordillera ken ammona no kasano a makitinnulong dagiti umili kadagiti pulis.
Mangnamnama pay daytoy iti agtultuloy a koordinasyon ti publiko iti nairtengan a kampanya kontra iti iligal a droga ditoy rehion tapnu mapunas ti parikut iti nasao a banag partikular ti panagmula iti marijuana.
Sigun kenkuana, kayatna nga iti panagtugawna kas dadaulo ti PROCOR ket ad-adu pay a pammadayaw ti maawat dagitoy gapu kadagiti agkakapintas a maaramidan ti pulisya.
