BAGUIO CITY – Nainget nga agsagsagana ti Police Regional Office Cordillera (PROCOR) tapno mapagtalinaed a naannayas ti panakaipatungpal ti May 9, 2022 2022 National and Local Elections.
Sigun kenni PLt.Col. Sibly Dawiguey Jr., dadaulo ti Regional Operations Division ti PROCOR, inadaptarda ti Predict, Prevent, Prepare, Perform and Post-Action and Assessment wenno 5Ps ti crisis management kas panagsaganada iti masungad nga eleksyon.
Kinunana a mangisaysayangkatda met ita ti Red Teaming wenno attack simulation exercises kadagiti posible nga insidente a saan a mapakpakadaan.
Nangipatungpalda metlaeng ti orientation kadagiti amin a baranggay officials para iti disbandment dagiti private armed groups (PAGS).
Nainget metlaeng ti koordinasyonda iti COMELEC ken dadduma a law enforcement agencies kas iti National Bureau of Investigation ken iti Armed Forces of the Philiipines.
Dinakamat ni Lt.Col. Dawiguey Jr. a kitkitaenda pay ti panangsanayda kadagiti pulis nga agserbi kabayatan ti eleksyon nangruna no saan a kabaelan dagiti mannursuro nga agturong kadagiti nasusulinek a lugar iti rehion.
Nabukel metten ti initial deployment plan ti PROCOR para iti masungad nga eleksyon a nakabigbigan dagiti agserbi nga escort kadagiti maaramat a ballot boxes.
Maisayangkat pay ti nainget a checkpoint iti nagduduma a lugar iti Cordilleras kabayatan ti panakaisayangkat ti eleksyon.
