BAGUIO CITY – Naipasidong iti blue alert ti Cordillera Regional Disaster Risk Reduction and Management Council Operations Center kasaruno pay laeng ti mapaspasaran a southwest monsoon wenno habagat a pappapigsaen ti bagyo a Gorio.
Iti pakdaar ti Office of Civil Defense-Cordillera, alas dose itay pangaldaw a naipangato ti alert level dagitoy gapu iti napigsa a panagtudo a mapaspasaran ditoy rehion.
Immunan a kinuna ti PAGASA a manamnama a mapasaran ditoy Cordillera iti sumaruno a sangapulo ket dua nga oras ti kalalaingan agingga iti napigsa a bayakabak ti tudo a posible a mangitunda iti panagregaay ti daga.
Gapu iti daytoy ket binalakadan ti OCD Cordillera ti publiko ken ti amin a local disaster risk reduction and management councils nga agridam ken aganadda kadagiti posible nga epekto ti agtultuloy a panagbayakabak ti tudo.
Kabayatanna, nabalakadan dagiti minero a saanda pay nga umuneg kadagiti usok para iti seguridad dagitoy.
