BAGUIO CITY – Impannakel ni Arnold Oglayon, coach ti Taekwondo – Elementary Division ti panagbalin a record breaker ni Rain Ramon a first timer iti Palarong Pambansa 2017.
Iti panakiuman ti Bombo Radyo, kinuna ni Oglayon a nakaipaay ni Ramon iti tallo a gold medals para iti rehion.
Kinunana a nagun-odna daytoy iti Taekwondo Poomsae – Individual B, Taekwondo Poomsae – Group ken iti Taekwondo Kyorugi Category 4.
Kabayatanna, dumanon met iti 9 gold medals ti pakabuklan a nagun-od dagiti taekwondo athletes ti rehion Cordillera malaksid pay iti 10 silver medals ken 5 bronze medals.
Nakaipaay met ni Gabriel Ivan Inacay iti dua a gold medal manipud iti Taekwondo Poomsae – Individual A ken iti Taekwondo Poomsae – Mixed Pair.
Nakaipaay met ni Khyla Kreanzzel Guinto iti maysa a gold medal manipud iti Taekwondo Poomsae – Mixed Pair ken maysa a silver medal manipud iti Taekwondo Poomsae – Individual A.
Kabayatanna, iti met sekondarya, nakagun-od dagiti taekwondo athletes iti dua a gold medals manipud iti Taekwondo Poomsae – Group ken iti Taekwondo Secondary Girls babaen kenni Liquiza Obas.
Inaklon ni coach Oglayon a ti panangisagana kadagiti atleta ti karigatan a paset ti nasao nga ay-ayam nangruna ta adu a bulan ti kasapulan para iti panagsanay dagitoy.
Impannakkelna pay nga agarup amin a taekwondo players manipud rehion ket nakagun-od dagitoy iti medalya.