BAGUIO CITY – Magagaranen ti Cordilleran police a mangibagi iti pagilian iti Man of the World 2017 a maangay inton Hulyo 28 sadiay Pasay City.
Iti ekslusibo a panakiuman ti Bombo Radyo ken ni PIns. Christopher “Chriz” Comicho Dulagan, kinunana a saan daytoy a makarikrikna iti aniaman a pressure gaputa magagaran daytoy a mangipakita iti kinapintas ti Pilipinas ken ti ugali dagiti Pilipino.
Kinunana nga iti agdama ket nainget ti panag-work-out daytoy, agbasbasa para iti communication skills ken agkarkararag para iti panagballigina iti nasao a kompetisyon.
Immuna a nangabak ni Dulagan iti Misters of Filipinas National Pageant idi napalabas a tawen a rason tapnu daytoy ti mangibagi iti pagilyan iti Man of the World.
Impanakkel pay ni Dulagan a tubo daytoy ti Tetep-an, Sagada, Mt. Province ken immakar laeng daytoy sadiay Silang, Cavite para iti panagadalna iti Philippine National Police Academy ken iti agdama ket kameng daytoy ti PNP Aviation Security Group, Terminal 1.
Ginuyugoyna met dagiti agtutubo nga igaedda ti agadal gaputa daytoy laeng ti kinabaknang a mabalin nga ipatawid dagiti nagannak dagitoy a saan a mabalin a takawen ti dadduma.
