BAGUIO CITY – Pimmusay ti maysa a Cordilleran a kameng ti Special Action Force iti agtultuloy a rinnupak iti nagbaetan ti pwersa ti gobyerno ken ti Maute local terror group sadiay Marawi City.
Sigun kenni PSupt. Mario Mayam-es Jr., commander ti 2nd Battalion Special Action Force a karaman kadagiti mangipatpatungpal iti operasyon sadiay, manarimaan ti operasyon dagitoy idi maatap a pinaltugan ti maysa a Maute sniper.
Ti agdama ket narekober metten ti bagi ti biktima ngem saanda pay a binigbig ti nasao a SAF trooper gaputa saan pay daytoy a naipakaammo iti pamilyana sadiay Abra.
Naamuan a ti nasao a trooper ket nakadestino sadiay Zamboanga ngem naipatulod sadiay Marawi City tapnu tumulong iti pwersa ti gobyerno sadiay.
Mainaig iti daytoy, imbinglayna nga iti panakirangetda kadagiti kalaban ket napaneknekanda ti kinalaing dagiti Maute fighter iti panakilaban dagitoy.
Kinunana a nakitada nu kasanu ti kinasagana a matay dagiti Maute fighters tapnu mapanda iti langit a kas iti pammati dagitoy.
Impettengna a ti mapaspasamak a gubat sadiay Marawi City ket maipapan iti ilablaban a pammati dagiti terorista ken ti panakaisalakan dagitoy.
