BAGUIO CITY – Manamnama a maiyawid sadiay Kalinga ti bangkay ti Cordilleran soldier a pimmusay iti panakirinnupak ti tropa ti gobyerno kadagiti terorita nga Abu Sayyaf Group (ASG) sadiay Bangkal, Patikul, Sulu idi kalman.
Nabigbig daytoy a ni Private First Class (PFC) Jay Clint Pasingan a taga-Pinukpok, Kalinga.
Maibasar iti report, nangisayangkat ti militar iti all-out offensive operations kontra kadagiti ASG kasaruno ti panangsaneb dagiti bandido iti soldado a Tausug a nangitulod laeng kadagiti kakadwana iti pantalan idi pay Enero 26, 2022.
Panggep ti operasyon nga anupen dagiti nabatbati a bandido nga inreport dagiti umili a mangituntunda ti riribuk iti komunidadda ken agtultuloy a mangbutbuteng kadakuada.
Nagresulta ti operasyon idi kalman iti panakaparmek ti bandido a ni alyas Omar Yakan iti sidong ni ASG sub-leader Ellam Nasirin ken iti panakakumpiskar ti K3 squad automatic weapon a maatap mnga armas ni Yakan.
Nupay kasta, kabayatan ti operasyon ket natamaan ni Pasingan a nagresulta iti ipupusayna bayat a nadangran met da Sgt. Michel Bagunu ken PFC Celestino Tano nupay addadan iti natalged a kondisyon.
Binigbig met ni Joint Task Force Sulu commander Major General William Gonzales ti kinabanuar ni PFC Pasingan.
Sigun kenkuana, ti napasamak iti soldado ket paset ti panangsalwadda iti tattao ti Sulu para iti panakaragpat ti kappia ken panagdur-as.
Iti agdama, naka-high alert amin a tropa ti gobyerno sadiay Patikul kagiddan ti panangisayangkatda iti pursuit operations tapnu maparmek ti nabatbati a miembro ti bandido nga ASG.
