BAGUIO CITY – Ipampannakkel dagit Cordillerans ti balligi a naragpat ti Igorot actress a ni Maribeth ‘Mai’ Fanglayan.
Daytoy ket kalpasan a nainominar ni Fanglayan kas Best Actress iti 2019 Gawad Urian nga idadauluan ti Manunuri ng Pelikulang Pilipino.
Nominado ni Fanglayan gapu iti panagakem daytoy kas Fasang iti pelikula a ‘Tanabata’s Wife’.
Kapada ni Fanglayan a nominated iti nasao a pammadayaw dagiti beterana ken nalalatak nga artista kas kada Pokwang, Bela Padilla, Nadine Lustre, Glaiza de Castro, Anne Curtis ken Ai-Ai de las Alas.
Immunan a nabigbig ni Fanglayan kas Best Actress iti 2018 ToFarm Film Festival gapu met laeng iti panagakemna iti ‘Tanabata’s Wife’.
Naipaayan met laeng iti nagduduma a pammadayaw ti nasao a pelikula ken dagiti casts daytoy idi napalabas a tawen.
Sigun kadagiti Cordillerans a na-interbyu ti Bombo Radyo-Baguio, uray nominated pay laeng ni Fanglayan iti Gawad Urian ket ibilbilangdan daytoy kas nangabak wenno Best Actress gapu iti kadakkel ti balligi a nagun-odna.
Kinuna dagiti Cordillerans a pammaneknek laeng daytoy a kabaelan dagiti Igorots ti mangipakita iti kinalaing ken talento dagitoy iti nagduduma a banag kas iti acting, martial arts, singing, ken adu a dadduma pay.
Ni Mai Fanglayan a tubo ti Mountain Province ket nagbalin a Bombo volunteer ti Bombo Radyo-Baguio kabayatan ti 2016 elections. [GJAB]