BAGUIO CITY — Nainget a pinaglibakan ni Councilor Benny Bomogao ti alegasyon a nagdawat daytoy iti P1.5 million manipud kenni Mabel Chagwaten, ti nangabak a bidder iti Baguio Blooms Exhibition and Exposition sadiay Lake Drive, Burnham Park.
iti panakiyuman ti Bombo Radyo iti konsehal, kinunana nga awan ti dinawat wenno naipaay kenkuana a P1.5 million ken kinaulbod ti nasao nga alegasyon.
kinunana a rumbeng a saan a mamati ti publiko iti nasao nga alegasyon a maysa a pammadaken kenkuana.
inyunay-unayna nga awan ti rason tapnu agkiddaw daytoy iti nasao a gatad gaputa ti bidding para iti market encounter ket dimmalan iti komprehensibo a proseso ken awan ti akemna iti nasao a banag.
immuna metten a pinaglibakan ni Chagwaten ti nasao nga isyu ken impettengna a ti proseso iti panangabakna iti bidding ket lehitimo ken legal ken awan ti rason tapnu agbayad pay daytoy iti asinoman nga opisyal ti gobyerno.
