BAGUIO CITY – Nailista ti Tabuk City sadiay Kalinga ti maikadua nga ipupusay sadiay nga addaan pakainaiganna iti COVID-19.
Maibasar iti waragawag ti lokal a gobyerno ti siudad, nasarakan laengen nga awanan biag ti maysa a COVID-19 positive patient idi parbangon kalman.
Ti nasao a pasyente ket 57-anyos a residente ti Barangay Agbannawag ken driver ti Gabriela Mija Kim District Hospital, no sadino, na-isolate daytoy iti nasao metlaeng nga ospital kalpasan a nagpositibo ti resulta ti swab test-na a naisayangkat idi Miyerkoles.
Maibasar iti rekord, ti pasyente ket close contact ti maysa nga index case ken addaan ti dadduma a sagubanit.
Nupay kasta, kinuna ti staff ti pagagasan nga awan ti inrekreklamo ti nasao a pasyente a sintomas kabayatan ti panag-quarantine daytoy.
Nailanad met iti report a ti immediate cause of death ti pasyente ket atake iti puso.
