BAGUIO CITY – Irtengan pay ti lokal a gobyerno ti Mankayan, Benguet dagiti paglintegan sadiay mainaig iti safety protocols nangruna kadagiti bunkhouses iti mining community sadiay kasaruno ti panagadu ti kaso ti COVID-19 kadagiti bunkhouses iti mining communityes iti Itogon ken Tuba.
Sigun kenni Mayor Frenzel Ayong, sinukimatdan ti kapabilidad ti ken polisiya ti maysa a kompanya ti minas sadiay a mangimaton no adda ti agpositibo iti COVID-19 kadagiti empleyado daytoy.
Kinunana a paset ti nairtengan a pagalagadan ti panakaipasidong iti 14-day mandatory quarantine iti quarantine facility dagiti sumrek a bisita ti kompanya ti minas.
Maikalikagum met ti panag-quarantine dagiti agsubli nga agtrabaho iti pagminasan kalpasan ti panagbakasyon dagitoy.
Maipasidong pay iti swab test dagiti sumrek nga agtrabaho iti pagminasan dagiti nagtaud kadagiti high-risk area tapnu maliklikan ti kas iti napasamak iti Itogon ken Tuba.
Nakasagana metten ti isolation facility ti kompanya ti minas nga addaan ti 27-bed capacity.
Inyunay-unay ni Mayor Ayong a napateg ti panakaipatungpal ti nainget a minimum health standards gaputa kadwa dagiti company workers ti pamilya dagitoy iti bunkhouse sadiay.
