BAGUIO CITY – Immado dagiti ipoproseso ti Baguio General Hospital and Medical Center (BGHMC) kasaruno ti panakadutok ti ospital kas independent COVID-19 testing center ken iti panakaipaay ditoy ti 5,000 a test kits ti COVID-19.
Sigun kenni BGHMC chief Dr. Ricardo Ruñez Jr., manipud iti innaldaw a 40 a COVID tests ket agipoprosesoda ita iti innaldaw nga 80-100 a COVID tests.
Kinunana a babaen iti daytoy ket napapartak met ti panakairuar ti resulta ti COVID tests dagiti pasyente tapnu maamuan ti kasasaad ti salun-at dagitoy.
Innayonna nga awanen ti backlog ti BGHMC Subnational Laboratory iti COVID test results isut gapuna a ti panangitedda iti resulta ket naibasar iti aktwal nga oras.
Immunan nga inlawlawag ni Department of Health – Cordillera Regional Director Dr. Amelita Pangilinan nga iti panakasertipikar ti BGHMC Subnational Lab a mangisayangkat ti independent COVID-19 tests ket saanen a kasapulan a maiturong pay iti Research Institute for Tropical Medicine para iti kumpirmasyon ti inisyal resulta.
Iti agdama, adda iti BGHMC ti siyam kadagiti positibo a COVID patients a bin-ig nga adda iti natalged a kondisyon.
