BAGUIO CITY – Dumanonen iti 19 ti bilang dagiti pimmusay ditoy Cordillera Region gapu iti COVID-19 kalpasan a nailista ti maysa nga ipupusay idi kalman ditoy Baguio City gapu iti nasao a sakit.
Maibasar iti impormasyon manipud iti DOH-Cordillera, ti kaudian a biktima ti nasao a sakit ket agtawen ti 69 a lalaki.
Nailista metlaeng idi kalman ti 100 a kanayunan a kaso ti COVID-19 iti Cordillera.
Nupay kasta, linawlawagan ti ahensia a naberipikaren dagiti saggaysa a baro a kaso ti COVID-19 sadiay Ifugao ken Mountain Province bayat a maipasidong paylaeng iti kanayonan a beripikasyon ti nabatbati a 98 a baro a kaso.
Nailanad iti rekord a dagiti maipasidong iti beripikasyon ket ti 3 a kaso sadiay Abra, 67 iti Baguio City, 20 sadiay Benguet ken 8 sadiay Kalinga.
Kabayatanna, nanayunan met iti 19 ti bilang dagiti naimbagan manipud iti nasao a sakit.
Iti agdama, pakabuklan a 1,755 ti bilang dagiti nagpositibo iti COVID-19 ditoy Cordillera Region.
