BAGUIO CITY – Ad-adda a ngimmato ti kaso ti COVID-19 iti rehiyon Cordillera ken nanayunan iti maysa ti bilang dagiti indibidual a pimmusay gapu iti nasao a sakit idi kalman.
Maibasar iti datos ti Department of Health-Cordillera, nailista ti kabaruan a 39 a kaso ti COVID-19.
Bukbuklen daytoy ti 32 iti Baguio City, 5 iti Benguet ken saggaysa iti Apyao ken Mt. Province.
Nagpabigbig met ti maysa kadagiti baro a kaso ti COVID-19 ditoy siudad no sadino, daytoy ket ni Doy Tabilog nga executive assistant ni Mayor Benjamin Magalong.
Iti impablaakna iti social media, imbalakadna ti panagpakonsulta iti doktor ken panag-obserbar iti kondisyon dagiti papagayam, kaopisinaan ken barangay officials a nakapulapolna manipud October 1, aldaw ti Huwebes agingga October 3, aldaw ti Sabado.
Nagkiddaw pay daytoy ti dispensa gapu iti insidente.
Kabayatanna, nailista ti 23 a kabarbaro a kaso ti panagimbag manipod iti COVID-19 a bukbuklen ti 18 iti Baguio City ken 5 iti Benguet.
Nupay kasta, nailista ti Benguet ti maikanem nga ipupusay gapu iti nasao a sakit.
Maibasar iti report, daytoy ket 84-anyos a lalaki manipud La Trinidad a naireport a nagpositibo iti COVID-19 idi September 28 ken na-admit iti Benguet General Hospital idi September 29.
Naamuan nga agsagsagaba ti nasao a pasyente iti dadduma a kondisyon iti salun-at.
Kabayatanna, pakabuklanen a 2,161 ti kaso ti COVID-19 iti Cordillera a bukbuklen ti 651 nga aktibo a kaso; 1,487 a panagrekober ken 23 nga ipupusay.
