BAGUIO CITY – Agtaltalinaed a Low Epidemic Risk ti Benguet iti baet ti panakailista latta ti kaso ti COVID-19 iti probinsia ken kagiddan ti panagtalinaed daytoy iti Alert Level 2.
Iti taripnong ti Provincial Inter-Agency Task Force ti Benguet, naamuan a nagdoble ti sigud a 3-5 a kaso ti COVID-19 iti innaldaw kadagiti napalpalabas a lawas no idilig iti 11 a kaso ti nasao a sakit a nailista idi kanikadua, January 4 ken iti 25 a kaso idi kalman, January 5.
Naamuan met a nupay low epidemic risk level ti Benguet, naipasidong ti Tuba iti high risk level bayat a ti La Trinidad ken Sablan ket naipasidong iti moderate risk level.
Naka-standby met dagiti temporary treatment and monitoring facilities (TTMFs) ti Benguet.
Agtalinaed pay dagiti nainget a border checkpoints tapnu maipasigurado ti panakasurot ti maikalkalikagum a vaccination card wenno negative RT-PCR test para kadagiti saan a residente ti Benguet nga agbiahe pastrek iti probinsia.
Dumalan latta iti triage sadiay Wangal, La Trinidad dagiti mapalubusan a sumrek iti probinsia.
Agtultuloy met ti panagbakuna iti probinsia kontra iti COVID-19 nangruna ta nababa ti vaccination rate ti Benguet.
Iti agdama, 52.77% ti naan-anay a nabakunaan kontra iti COVID manipud iti nasurok 388,000 a puntirya a popolasyon iti probinsia.
