BAGUIO CITY – Manamnama a sumangpet ditoy Baguio inton Biyernes, Enero 29 ti COVID-19 vaccine freezer a ginatang ti lokal a gobyerno ti siudad.
Iti eksklusibo nga interview ti Bombo Radyo Baguio, pinagyamanan ni Mayor Benjamin Magalong ti Chinese business group a nakatinnulong ti city government para iti panakagatang ti nasao a freezer.
Kinunana maysa laeng nga yunit ti nasao a kagawaan ngem mabalin a maki-aramat ti dadduma a munisipyo malaksid iti siudad.
Innayonna nga ur-urayen laengen ti city government ti software nga ipatulod ti national government para iti uniform vaccine registration system sakbay ti panagbakuna.
Mangnamnama pay ti Contact Tracing Czar a malpas ti vaccine deployment action plan ti siudad tapnu maamuan ti percentage dagiti umili ti siudad a nakasagana nga agpabakuna.
Impasiguradona met laeng a daytoy ti umuna nga agpabakuna tapnu mabukel ti kumpiansa dagiti umili iti bakuna kontra iti COVID-19.
