Inyunay-unay ni Atty.Reyman Solbita, Election Officer iti Tabuk City, Kalinga kadagiti amin nga agpangpanggep a mangipila iti Certificate of Candicacy(COC) inton bigat a sapsapaenda ti agturong iti filing venue tapno maliklikan ti “cramming” wenno panagkamakam nangruna ket maysa kadagiti naobserbaran a karit ti saan a panakaawat dagiti sumagmamano nga agngayangay kadagiti dadduma nga entries a kasapulan a mai-fill out kadagiti kaskenan a dokumento.
Iti panakiuman ti Bombo Radyo kenni Atty.Solbita, agtaltalinaed nga unopposed ti posisyon iti kinamayor gapu ta maysa paylaeng nga independent politician ti nakaipila iti kandidaturana, kasta met a maysa iti kinabise-mayor a nagtaud met iti Partido Federal ng Pilipinas.
Malaksid iti dayta, adda metten iti walo(8) a pulitiko a nakaipila iti kandidatura para ti kina-sangguniang panlungsod.
Iti immuna nga innem nga aldaw iti Certificate of Candidacy filing, pakabuklan paylaeng a sangapulo(10) ti nakaipila iti kandidaturana iti nadakamat a siudad agingga iti agdama nu sadino,kaadwan kadagitoy ket reelectionist.
Sigun kenni Atty. Solbita, namnamaenda nga adu ti mangipila inton bigat iti kandidatura gapu ta mamati dagitoy a swerte ti numero wenno petsa nga otso(8).
Mainaig iti dayta, imbinglay ti opisyal a natalged ti kasasaad ti Tabuk City ken awan ti mapaspasamak a kinaranggas nga adda ti pakainaiganna iti eleksyon rason a saan pay maibilang daytoy kadagiti areas of concern.
Nupay kasta, saan nga inlibak ni Atty. Solbita nga adda ita iti tension iti dua a tribo gapu iti napasamak a pammapatay itay laeng nabiit ngem kinunana nga maysa daytoy a tribal war ken saan nga election-related violence.//Bombo Rob Dominguez
