Ngimmato ti crime incidents a mailislista iti masakupan ti Baguio City Police Office -Station 9 manipud Enero agingga Mayo 31 ita a tawen nu idilig iti kapada a bulan idi napalabas a tawen.
Iti ekslusibo a pannakiuman ti Bombo Newsteam kenni Pcpt. Aldrin Saltin, station commander ti BCPO Station 9, dumanon iti 48 ti bilang ti krimen manipud Enero agingga Mayo ita a tawen, nangatngato iti 34 a nairekord da iti kapada a bulan idi napalabas a tawen.
Inlawlawag daytoy a ti crime incidence ket addaan tallo a kategorya: index crimes, non-index crimes, ken public safety indicators no sadinno dumanon iti sangapulo ti nairekord nga index crimes pakairamanan ti murder, theft, rape, ken dadduma pay.
Dumanon met ti 14 ti nailista iti sidung a non-index crimes pakairamanan ti drug cases, estafa, ken dadduma pay a kaso bayat a 24 met ti nailista a kaso ti public safety indicator pakairamanan ti Vehicular Traffic Accidents.
Sigun keni Pcpt. Saltin, kangrunaan a nangpangato ti nailistada a crime incidence ket dagiti vehicular traffic accidents.
Kabayatanna, ngimmato metlaeng ti robbery ken theft incidents ita a tawen no sadino dumanon ti lima ti napasamak a robbery ken dua met ti theft.
Impeksa ti nasao nga opisyal a maysa kadagiti kadawyan a modus dagiti agtatakaw ket ti akyat bahay no sadino dumaldalan dagitoy babaen kadagiti nakalukat a tawa.
Gapu iti dayta, mas strategic itan ti pannakadeploy dagiti kapulisan kadagiti masapukan ti nasao nga istasyon tapno masigurado a marikus dagiti is-iskinita.
Iningetanda metlaengen ti pannakaipatungpal ti curfew tapno makissayan dagiti krimen.
Malaksid iti dayta, agtultuloy metlaeng ti koordinasyon dagitoy kadagiti barangay officials para iti panangprebenrat ti anyaman a krimen iti masakupan dagitoy.
Agpalpalagip met daytoy iti publiko iti panangsalwadda kadagiti pagtaenganda ken sumurotda kadagiti nagduduma nga ordinansa nga ipatpatungpal ti siudad tapno maliklikan ti anyaman a posible a mapasamak a krimen. // Bombo Noveh Organo
