BAGUIO CITY – Bimmaba iti 46% ti crime volume a nairekord ti Baguio City Police Office (BCPO) manipud July 2016 agingga June 2017.
Maibasar iti rekord ti BCPO, bimmaba iti 4,655 ti crime volume iti siudad iti nasao a panawen manipud iti datus nga 8,545 a crime volume idi July 2015 agingga June 2016.
Bimmaba iti 73% ti nairekord-da nga index crimes a dumanon iti 1,237 manipud iti 4,657 a kaso ken kangrunaan a bimmaba dagiti kaso ti panagtakaw, panagdangran wenno physical injuries ken ti robbery wenno panagtakaw nga addaan madadael a sanikua.
Nupay kasta, ngimmato met dagiti kaso ti panagrames ken pammapatay, partikular ti murder ken homicide kabayatan ti nasao a panawen.
Impannakel met ti BCPO a ngimmato ti clearance efficiency dagiti index crimes a dimmanon iti average a 68% bayat a ti index crime solution efficiency ket ngimmato met iti 51%.
Agtatalinaed pay a positibo ti BCPO iti agtultuloy a panagbaba dagiti mapaspasamak a krimen iti siudad.
Sigun kenni BCPO City Director PSSupt. Ramil Saculles, pagyamyamananna ti suporta dagiti opisyal ti siudad kadagiti kampanya ti pulisya nangruna ti panakitinnulong dagitoy iti panakarisut dagiti rason iti mapaspasamak a krimen iti lokalidad.
Kidkiddawenna met ti panakikoordinar dagiti amin a residente ti 128 a babbarangay ti siudad iti pulisya ken ti panagbalin dagitoy a naridam kontra kadagiti mapagduadua-an nga indibidual.
Innayonna a babaen iti daytoy ket agtultuloy ti panagbaba dagiti mapaspasamak a krimen iti lokalidad tapnu agtalinaed ti titulo ti City of Pines kas ‘most peaceful and orderly city’ iti entero a pagilian. -Glory Balegan/Jorton Campana
