BAGUIO CITY – Bambantayan ti Municipal Disaster Risk Reduction and Management Council (MDRRMC) ti Bakun, Benguet dagiti naideklara a critical areas ti ili a posible a maapektaran iti Bagyo a ni Falcon ken ti mapaspasaran a habagat.
Iti interview ti Bombo Radyo kenni Bakun MDRRMC head Alvin Comila, dinakamatna a tututukanda dagiti sinking areas sadiay partikular iti Barangay Poblacion ken Barangay Gambang gaputa dagitoy ti kangrunaan nga agregreggaay tunggal panagtutudo.
Kinunana a nagdeklarada metten iti ‘blue alert status’ iti entero a munisipyo kagiddan ti waragawag ti Office of the Civil Defense-Cordillera tapno mawanawananda dagiti napeggad a disso ti ili.
Impanamnama met a nakasagana dagiti agserbi nga evacuatuoin centers ti Poblacion ken Gambang iti kanito a ngumato ti lebel ti peggad nga itunda ni Bagyo a Falcon.
Kinunana pay a nakaposisyonen dagiti agresponde a heavy equipment pakairamanan ti loader ken backhoe a tumulong a mang-mobilize iti clearing operations dagiti otoridad.
Kabayatanna, umap-apela ni Comila kadagiti motorista partikular kadagiti mannalon a saanda a basta-basta nga agbiyahe nangruna ita a delikado paylaeng ti kasasaad ti kalsada sadiay Bakun.
Impettengna a no saan a napateg ti ranta dagitoy iti sabali a lugar ket nasaysayaat laengen nga itantanda paylaeng ti panagbiyaheda.
Kinunana a nasken nga ipangruna dagiti umili ti seguridad dagitoy nangruna ita a panagtutudo.
Dinakamatna pay a gapu iti mapaspasaran a habagat ket saan a siento porsiento a natalged a dalyasaten dagiti motorista dagiti kalsada iti masakupan ti nasao a munisipyo.
