BAGUIO CITY – Nakaru a naapektaran ken nalugi dagiti cutflower farmers ken vendors iti probinsya Benguet gapu paylaeng iti epekto ti COVID-19 pandemic.
Iti panakiyuman ti Bombo Radyo Baguio, kinuna ni Bahong Punong Barangay Belmer Elis ti La Trinidad, Benguet nga adu a cutflower farmers sadiay ti nalugi gaputa awan ti aggatang kadagiti muladada a sabong.
Kinunana a bimmagsak pay ti presyo dagiti cutflowers gapu iti panakaiparikep dagiti kamposanto ita nga aldaw agingga inton November 4 iti baet ti panakarambak ti aldaw dagiti minatay.
Dinakamatna a manmano dagiti gimmatang kadagiti cutflowers gapu iti nalimitaran a garaw ita dagiti tatao ket manmano dagiti nagturong kadagiti kamposanto.
Innayon ti kapitan a manmano pay dagiti buyers manipud iti Metro Manila a nagturong iti barangayda tapnu agangkat kadagiti sabong malaksid a sumagmamano kadagiti lugar a pakaiturturongan dagiti maang-angkat a sabong sadiay Bahong ket nakapasar ti panaglayos iti napalpalabas nga aldaw.
Linawlawagan ni Kapitan Elis a saan a nagsobra ti suplay dagiti sabong ita gaputa adu a cutflower growers ti saan a nagmula ti sabong.
Nupay kasta, iyap-apelana a no mabalin ket mailaylayon ti panakailukat dagiti kamposanto inton sumaruno a bulan tapnu makasubbot met dagiti mannalon ti sabong.
Iyap-apelana pay ti panangipaay met ti gobyerno iti pondo para kadagiti cutflower growers a nalugi ken apektado iti agdama a COVID-19 pandemic.
Impettengna iti Department of Agriculture (DA) ti panakailatang ti pondo para iti cutflower industry a maysa kadagiti kangrunaan a pagbiagan dagiti mannalon iti probinsia ti Benguet.
Sigun kenkuana, nasken a mairaman dagiti sabong iti listaan ti DA kadagiti high value crops tapnu maipangrunada met.
Nupay kasta, impeksa ni Kapitan Elis ti panagyamanna kadagiti tulong nga impaay ti gobyerno para kadagiti cutflower growers ti barangay dagitoy.
