Maranimaan ti panagadal ti Baguio City Veterinary and Agriculture Office (CVAO) ti maysa a singasing mainaig iti regularization iti importation kadagiti nateng iti siudad.
Sigun kenni Godfrey Sapdit, Agriculturist II iti CVAO, adda dagiti imported a nateng a napalubosan a makastrek iti siudad babaen kadagiti maipaulog a pagannurotan. Nupay kasta, masapul a maipatungpal ti umno a monitoring ken pannakasukimat kadagiti produkto tapno makita no legal wenno saan a maiparbeng ti pannakalako kadagitoy.
Innayonna a ti maysa kadagiti singasingda ket ti panangaramid ken panangipatungpal iti ordinansa a mangilawlawag kadagiti pagannurotan ken responsibilidad dagiti maseknan iti panagiseserrek kadagiti imported a nateng.
Babaen iti nasao a wagas, manamnama a mapapigsa ti panangkontrol kadagiti produkto a makastrek iti siudad, nangruna kadagiti maatap a naiyuneg babaen iti ilegal a wagas.
Kabayatanna, ginuyugoy ni Sapdit ti publiko a dagus nga ireport iti CVAO dagiti makitada a produkto a maatap a smuggled tapno maiyuman daytoy kadagiti maseknan nga ahensya para iti umno a pannakasukimat ken aksyon.
Sigun kenkuana, napateg ti koordinasyon dagiti lokal ken nasyonal nga ahensya tapno masukimat dagiti reklamo ken matungpal dagiti maipakat a pagannurotan maipanggep iti panaglaklako kadagiti imported a nateng.
Maipalagip nga idi bulan ti Setiembre , rimuar dagiti report kadagiti imported a broccoli a maatap a smuggled iti Baguio City ken La Trinidad, Benguet. Kas paset ti panangsukimat iti daytoy, nangisayangkat ti Department of Agriculture-Cordillera (DA-CAR) ken dagiti lokal a gobierno iti panagkonsulta tapno maamuwan dagiti umno nga addang seknan iti nasao nga isyu.// via Bombo Khey Reparip
