BAGUIO CITY – Nangrugin dagiti aktibidad ti Baguio City para iti kaunaan a selebrasyon ti Saleng wenno Tree Festival nga agpaut agingga inton September.
Narugian daytoy babaen iti panakipaset ti siudad iti World Bike Day itay laeng nabiit, no sadino, naisayangkat ti “Cycling for the Environment”.
Pinasetan daytoy ti 47 a team dagiti cycling enthusiasts a bukbuklen ti sag-lima tunggal team.
Nangrugi ti panagbisekletada iti Lion’s Head sadiay Kennon Road ken nagleppas iti sangwanan ti City Hall nga addaan kaadayo a 12 a kilometro.
Impeksa met dagiti agtutubo a nakipaset iti aktibidad ti nalaus a ragsakda gaputa nakatulongda iti panakaiyendorso ti panagaramat ti bisekleta iti transportasyon.
Kinunada a dakkel met a banag ti panagbisikleta kadagiti agtutubo gaputa mailiklikda iti bisyo ken maipamaysada ti imatangda kadagiti kompetisyon ken iti napintas a rikna nga ipapaay ti panagbisbisekleta.
