Impadag ni Senador Sherwin Gatchalian a dagiti dadaulo iti Philippine Offshore Gaming Operators (POGOs) ket agtaltalinaed latta iti Pilipinas ken agtultuloy ti panangisayangkatda ti iligal nga aktibidad a kas ti kidnapping, pito a bulan sipud idi naibilin ti “total ban.”
Kinuna ni Gatchalian a naipaayan isuna ti impormasion a dagiti dadaulo ket agtaltalianed ken agtultuloy nga agar-aramid ti “pocket scams” ken panag-kidnap ti tumunggal maysa, agraman ti maysa nga ubing a naala mainaig kadagiti aktibidad ti POGO.
Daytoy ket iti baet nga imbilin ni President Ferdinand “Bongbong” Marcos Jr. bayat iti State of the Nation Address (SONA) idi Hulio idi napalabas a tawen a maipawil ti amin a Philippine Offshore Gaming Operators iti ngudo ti tawen 2024, a dinakamatna a ti sektor ket “grave abuse” ken “disrespect” iti sistema ken pagaladagan ti Pilipinas.
