Nangipila ni Criminal Investigation and Detection Group (CIDG) chief Police Brigadier General Nicolas Torre III ti kaso iti Department of Justice kontra kenni sigud a President Rodrigo Duterte gapu iti statement daytoy a patayenda dagiti 15 a senador.
Nupay, kinuna ni Senator Ronald “Bato” dela Rosa a joke wenno angaw laeng ti sigud a Presidente dagiti imbagana ket nangipila latta iti reklamo ni Torre kontra kenni Duterte gapu ta mamati daytoy a saan a naikalintegan dagiti sasao nga insawangna ken ti inaramidna a sedisyon.
Impetteng ni Torre a saanen a mabalin ti panangisawang iti nagkakadakkes a sasao kas iti panangpapatay ken kalpasan ti sumagmamano nga aldaw ket ibaga a joke wenno angaw laeng.
Maipalagip a bayat ti PDP-Laban proclamation rally ket inyendorso ni sigud a President Duterte dagiti senatorial candidate daytoy nu sadino kinunana a maaddaan amin dagitoy ti pwesto iti senado nu patayenda dagiti 15 a senador.
Iyunay-unay ni Torre a ti panangipilana iti reklamo kontra kenni Duterte ket awan koneksyonna iti eleksyon nu di ket inaramidna daytoy kas director ti CIDG, kas maysa a Pilipino ken maysa a pulis.
