BAGUIO CITY – Nagkalintegan ni Public Order and Safety Division (POSD) chief Marvin Herrera kadagiti ladawanna nga agwarwaras ken mapagsasaritaan iti social media a pakakitaan kenkuana a nakaiggem iti paltog ken kutsilyo.
Iti eksklusibo nga interview ti Bombo Radyo Baguio, inaklonna a dagiti ladawan ket paset ti nalidem a napalabasna idi panawen nga agsagsagaba ken lablabanenna ti depresyon.
Nupay kasta, inyunay-unayna a pribado dagiti ladawan ken saan a naipabpablaak iti social media.
Impettengna pay nga awan ti pammalubosna iti panakaipablaak iti social media dagiti nasao a ladawan nupay dinakamatna nga adda ti tao a mangdaddadael kenkuana a nangiruar kadagiti nasao a ladawan.