BAGUIO CITY – Nainget ti panangwanawan ita ti Fairview Barangay ditoy siudad ti Baguio kadagiti ubbing sadiay a maaw-awagan ti Sayote Boys.
Iti panakiuman ti Bombo Radyo Baguio, kinuna ni Fairview Kagawad Shirly Fagkangan nga addan dagiti ubbing sadiay a pinaayabanda ti nagannak dagitoy ken nabagbagaan iti barangay hall para iti panangbantay dagitoy kadagiti annakda.
Kinunana a saan laeng a dagiti Sayote Boys ti bambantayanda ngem aminen nga ubbing nga adda iti ruar iti masakupan ti barangayda ken tunggal adda dagiti makitada iti rabii nga adda paylaeng iti kalsada ket dagus nga itulodda iti pagtaengan dagitoy.
Inaklonna pay a taga-Purok 7 dagiti orihinal a Sayote Boys ken manmano laeng dagitoy ngem idi limmatak ket adda metten dagiti nainayon a babarito.
Maipalagip a nagbalin nga isyu dagiti Sayote Boys gaputa malaksid iti panagilakoda ti sayote ket agar-aramid dagitoy iti maikaniwas kas iti panagtakaw.
Nalidayan met ni Kagawad Fagkangan gaputa passive wenno saan nga aktibo dagiti nagannak dagiti nasao nga ubbing.
Gapu iti daytoy, iyap-apelana ti panakitinnulong dagiti nagannak iti panakabantay ken panakabagbaga dagiti annak dagitoy nangruna ta ti responsibilidad iti daytoy ket saan laeng nga ibakbaklay dagiti pulis ken dadduma a maseknan nga opisina.
